Bu il iyunun 1-nə Azərbaycanda vaxtı keçmiş kreditlərin məbləği son bir ayla müqayisədə 1.1 faiz artaraq 508.3 milyon manata yüksəlib.
Bu barədə Azərbaycan Mərkəzi Bankı (AMB) bu gün, iyunun 25-də məlumat yayıb.
Ölkədə vaxtı keçmiş kreditlərin həcmi ilin əvvəli ilə müqayisədə 13, son bir ildə isə 9 faiz artıb.
Mayın sonuna vaxtı keçmiş kreditlərin ümumi kredit portfelində çəkisi isə dəyişməyərək 1.7 faiz təşkil edib.
Azərbaycanda 2015-ci ildə iki devalvasiya baş vermiş, manat iki dəfədən çox dəyər itirmişdi. Onda problemli kreditlərin 2 milyard manata yaxınlaşdığı açıqlanmışdı. 2019-cu il fevralın 19-da isə prezident fiziki şəxslərin xarici valyutada olan problemli kreditlərinin həlli ilə bağlı fərman verdi. Onda 10 min dollara qədər kredit götürən fiziki şəxslərin borclarında 2015-ci ildə baş vermiş devalvasiyalardan sonra yaranmış fərq dövlət hesabına ödənildi. Bundan sonra problemli kreditlər azaldı. Amma 2021-ci ilin əvvəlində yenidən bu kreditlərin artdığı açıqlanmışdı. Bu, onda koronavirus pandemiyasi ilə izah edilirdi. 2022-ci ildə isə yenidən problemli kreditlərin azaldığı vurğulanırdı.
Bir sıra müstəqil iqtisadçılar yenidən vaxtı keçmiş kreditlərin artmasını əhalinin sosial problemlərinin artması ilə izah edirlər. Hökumət rəsmiləri isə, hələlik, bu məsələni şərh etməyiblər.